Àustria e Alemanha son a aculhir, dempuèi dissabte, de refugiats que fujon la guèrra de Siria e tanben la cachavièlha d’Ongria. Lo govèrn ongrés de Viktor Orbán los a maltractats e a ensajat de los embarrar dins los diches “camps d’aculhida”. La majoritat dels refugiats que s’amassavan dempuèi longtemps dins las garas de tren de Budapèst decidiguèron divendres de far lo camin a pè en esperant qu’Àustria e Alemanha los daissarián intrar e amb l’enveja de fugir l’Ongria d’Orbán e de sa polícia. Los govèrns alemand e austrian decidiguèron de daissar passar temporàriament los refugiats e de los aculhir.
 
Segon çò qu’explica lo jornal britanic The Guardian, mostrèron lor gaug quand foguèron arribats en Àustria e en Alemanda. De fach, de ciutadans austrians e alemands preparèron per los refugiats de manjar, de beure, de vestits e de flaçadas e menèron tot aquò a las garas de trens e de buses. Podètz veire los imatges que l’agéncia de l’ÒNU pels refugiats las a fiuladas sus Twitter:
 

Huge volunteer operation in #Vienna, #Austria, donating + distributing supplies to refugees arriving from #Hungarypic.twitter.com/G8tctHlgKR

— UN Refugee Agency (@Refugees) September 5, 2015

 
D’activistas alemands e austrians organizan un convòi per menar los refugiats que son demorats en Ongria
 
Qualques grops de refugiats an pas agut l’astre de fugir Ongria e son demorats a Budapèst. Se tracta mai que mai de las familhas que se vesián pas capablas de far una marcha a pè tan longa. En vesent aquela situacion, qualques activistas austrians e alemands pels dreches umans an organizat un convòi de veituras particularas per anar quèrre aqueles refugiats e los menar en Àustria e en Alemanha.
 
Las veituras —aperaquí 140— partiguèron ièr de Viena cap a Budapèst en una iniciativa privada que s’es nomenada  Refugeeconvoy (“Convòi dels Refugiats”). Una de las participantas, Angelika Neuwirth, a dich a la BBC: “cresi qu’es lo mieu dever. Soi maire, soi una femna d’Àustria e pòdi pas pus barrar los uèlhs”.
 
Los membres del convòi sabon que çò que fan es illegal en Ongria. La pòrtavotz de la polícia ongresa, Viktoria Csiszer-Kovács, confirmèt que los que pòrtan d’immigrants a travèrs de la frontièra inclomplisson la lei. La setmana passada qualques activistas austrians faguèron de veituratges en Ongria per anar quèrre de refugiats e qualques unes foguèron arrestats, acusats de trafec de personas, mas foguèron remeses en libertat sul pic.
 
 
Lo papa Francés fa una crida a las parròquias per que n’acuèlhan
 
Lo papa Francés a fach una crida a las parròquias d’Euròpa tota perque dobriscan las pòrtas a las familhas que fugisson los conflictes armats. Dins la pregària de l’angèlus d’aqueste dimenge a dich que “cada parròquia, cada comunautat religiosa, cada monastèri, cada santuari en Euròpa” deu aculhir de familhas de refugiats.
 
 
Ongria enduresís la lei
 
Mentretant, lo primièr ministre ongrés, Viktor Orbán, ten son ton provocant, quitament xenofòb, en disent: “La realitat es qu’Euròpa es menaçada pel flux massís de personas, fòrça desenats de milions de personas poirián venir en Euròpa. Parlam ara de centenats de milièrs, mas l’an que ven parlarem de milions, e aquò a pas de fin. Còp sec veirem que sèm una minoritat dins lo nòstre pròpri continent”.
 
Ongria enduresirà las leis contra l’immigracion. Lo sieu parlament aprovèt divendres una seguida de nòrmas que preveson, entretant, de penas de fins a cinc ans de preson per los que crosaràn las siás frontièras de manièra illegala. Las leis intran en vigor a partir del 15 de setembre. E mai, la setmana que ven lo parlament ongrés votarà de leis que permetan de mobilizar l’armada per defendre las frontièras.